والصياد , كسرى
قالك فزمن كسرى الحوت كان غالي وعزيز قليل وين تشوفو, واحد الصياد مزهار , صيد حوتة سمع بيه كسرى وامر الحراس باش يجيبوه هو والحوتة
الحاصول جابوه وقفوه قدامو وسولو قالو : وشحال راهم عاطيينك فيها نتاع دراهم؟
قالو الصياد : معطاوش
قالوا كسرى: وشحال راك طلب نت فيها؟
قالوا الصياد : مشي لبيع
كسرى شحن وتعصب وقال فراسو نغريه بدراهم , قالوا : واش رايك نعطيك كموسة دراهم و تعطهلي؟
الصياد فكر مزيان وقالوا : هاك الحوتة راهة نتاعك دا الكموسة وخرج مع الباب
الجارية حسدت الزوجة ديال الصياد وفكرتلو فشي لعبة تديلوا بيها دراهم , قالت لكسري يا سيدنا خليت صياد ضحك عليك ودالك كموسة دراهم على جال حوتة خانزة معندكش تا فريجيدار وين ديرها ؟؟
كسرى سمع كلامها وخمم وقالها ، والله يلا بصح ضحك عليا وليني سي ترو طار دروك نكلعلو دراهم
قتلوا لجارية نتا خطيك أنا ندبر روحي معاه غير جيبو وقفوا قدامك
كسرى أمر الحراس بش يجيبوا الصياد
الجارية قالت لصياد : هاد الحوتة أنثى وذكر ؟باش يلا قال ذكر تقولوا السلطان بغى يدبرلو على أنثى ولا قال أنثى تقولوا العكس
الصياد فهمها باغيت تلعب عليه خمم وقالها :هاد الحوتة خنثى يعني أنثا وذكر فنفس الوقت
ضحك السلطان والحراس وgاع الناس لكانو حاضرين تماك ماتو بالضحك والسلطان أمر باش يعطيو للصياد كموسة دراهم اخرى على الدكاء النباهة ديالو .
دا دراهم وجا خارج فرحان ويخمم واش يدير بيهم كي وصل للباب طحتلوا قطعة نقدية ، هود رفدها وردها بلاصتها، الجارية شافتو :
قالت للسلطان : شوف أسيدي على جيعان ميحشمش
طحتلوا قطعة فالأرض وهود هزها ,
وقالت للصياد : كيفاش عطاتك نفسك دير كيما هاد جيست قدام السلطان
السلطان عاود شك قال للصياد أرواح هنا ،قالوا واش هاد قلة الحيا ؟؟
الصياد عاود خمم مزيان ورد عليه قالو : يا السلطان صفي نيتك هادي ماقلت حياء ماتجوعيف وليني القطعة النقدية نتا راسم عليها فكورتك وأنا قلبي ميطوعنش من بعد هاد الخير كامل لي غرقتني فيه نخلي وجهك مرمي فالأرض
السلطان جاه البكاء وحتى لي كانو حاضرين وأمر باش يزيدوه كموسة اخرى ديال الدراهم ويوصلوه تا لباب دارو
