زغْرْتُوا يا المكناسِيَّاتْ

مَكناس يا عرُوسة مَرْفُوعَة بِينْ اصْوارْها

عرِيسْها مولاي إسمَاعيل و الزيتون نُوَّارْها

مكناس يا مِّيمة ترَبِّي أجْيالْ في دارْها

يا بزُّولة حنِينة ترَضّعْ أولادْها و زُوَّارْها

كُلْها بِيبانْ عالية مفْتُوحَة ترْمِي علِيكُم عارْها

بْ ماها و زِيتُونْها تغَدِّيكُمْ امْشَرْطاهْ بْ اظْفارْها

الدَّاها وْالدَّها مولاي إسماعِيل مولاها

الدَّاتُو وْ الدَّاتُو لالّةَ مكناس مُولاتُو

الدَّاها و الدَّاها مولاي إسماعِيل اللِّي بناها

الدَّاتُو وْ الدَّاتُو... هي بالآثاراتْ بصماتُو

دخْلاتُو فْ التاريخْ و الناس ما انْساتُو

مكناس كالدُّور... بين اصْوارْها كالدُّور

اللِّي حب إيتْشافا.... الشيخ الكامل إيجي إ يْزُورْ

اللي حب يتْمَتَّعْ ...من صهريجْ السواني لباب المنصور

نَقْشُوا لها احْنِينَة.. جِيبُوا الجاوي و البخُورْ

يا ما"ء" مكناس.. يا عسل الجبالْ

فيكْ دوا"ء" النفس و راحة البال

اللِّي شَرْبك.. إِيفُوتُو الحال

إيتْشافا ..و عُمْرُو يطْوالْ

يا ما"ء" مكْناسْ…. يا دموعْ الأحْبابْ

يا أصل الكرم و الجُود و الترحابْ

يا هوا"ء" مكناسْ… يا صدَرْ الوالِيدا

عليكْ التَّكِّيتْ.. و طَوَّلْتْ التَّنْهيدة

يا شمس مكناس ياشَقْرَا بين السَّمْراتْ

عيُونْكْ الصفْرا"ء" ترارِي بالزِّيتُوناتْ

غيرْ الذوقها بْأنواعْها... تنسى هم الحياة

صَهْرِيج السْوانِي يااللِّي كان خابِيْة العَوْدانْ

صَهْرِيج العينْ فيه تسافر و تبَرَّدْ العَطْشانْ

ما يفَيَّقْ الحوتْ من نعاسُوا و يرَيّح الوجدان

بْصمْتْ يغَذِّي الرُّوحْ ...موسِيقْتُو بعزف الرحمانْ

حَديقْتُو المعلقة بْحالْ عُشْ لَحمام فُوقْ البُنْيانْ

تْخَلِّيكْ تحْلَمْ بِينْ أشْجارْها ...كأنَّكْ فْ جنة الرَّضْوانْ

حديقة أشجارها وْ زْهورْها ملائكة ممنوعة للشَّيْطَانْ

زغْرْتُوا يا المكناسِيَّاتْ

ف جنة الحياة

جيبُوا لَهدِياتْ

لْ زينْتْ لَعْرُوسات

الله م صلِّي عْليك أرسول الله

جيبو لْلعْرُوسة عِيساوَى

خَلِّيوْها تجذب أو الدَّاوا

طالْبِينْ التّسْلِيمْ أرِجالْ لبلاد

الشيخ الكامل يا أب لَجواد

زوروه أو تْنالوا المرادْ

خَلِّيوْنِي نجذب عل الدقة المكناسية

خَلِّيوْنِي نبَرَّدْ نارْ فْراقْها اللِّي فِيَّا

خَلِّيوْني نجذب عل الدقة العِيساوِية

انْسَى غربتي فْ الدِّيارْ الفَرَنْسِيَّة

خَلِّيوْنِي نجذب على ارْكابِيّاَ

طالْبينْ التَّسْلِيمْ لجواد الإسْماعِيلِيَّة

خَلِّيوْنِي نْتْحَيَّرْ على النَّغْمة العِيساوِية

خَلِّيوْنِي نْجْذبْ على فراق المَّالِيَا

خَلِّيوْنِي نتحيّر على غضب الدنيا

ما تشدُّونِيش ها العارْ حْنُّو فِيَّا

خلِّيوْنِي واخا يعْواجُوا يدّييّا أو رجلييّا

التسليم آلالّة مليكة أو لالّة عيشة البحرية

ها الزين الفتان...! هاهو...!

إنَوَرْ كْ و تزيان

هاسلطانة العرْسانْ...! هاهي...!!!

يا عظِيمة البُنْيان

يا لُون الرمان

من قديم الزمان

من أجمل البلدان

مع ناسْها الجلسة تزيانْ

مكناس مرهونة

عند احبابْها مرهونة

فْ دارْ لجواد مرهونة

يا خَدْ مكناس…! يا ساحة لهديم

خَدْ أحْمَرْ وسطو زِيتُونة من قْديمْ

الله عْلى خَدْ...!

لله عْلى خالة...!

سُبْحان الكريم...!

الله على زيتُونة...!

الله على خالة تْخَلِّيكْ تْميمْ...!

الله على خالة وسط الخد...!

سبحانك ياعظيم...!

خَدْ مكناس… يا ساحة لهْديم

فيك لحْلاقي اتْحَيّْدْ الضِّيمْ

سماكْ صافية عمرها ما تغيم

مللّي يْجِي الليل …يلُوحْ خيمْتُو عَلْ الحْبِيبة

إيكمّطْها و قَمرُو يحرُسْها من اليد لغرِيبة

سماك هو سقفْ مكناس.. وسطو شمس ك الثريّا

الله عْلى طاجِينْ...!

الله عْلى بْرَّادَة بْصَنعَة يْدِّييَّا...!

الله على نَقْشْ لْصْوارْ...!

الله على نقش فْ الصِّينِيّة...!

الله على طَرْزْ فْ الجلاَّبْة..!

فْ البْلْغة أو الخَدِّيَّة...!

بيتْها من زمان محافْظْ عَلْ الأصالة المكناسِية

بْبفضلك و بفضل جَارْتْنا الدار الفاسِية

هاكْدا يكونوا بناتْ رجالْ المْحْضِيَّة

يافاس يا الأم العِلْمية

يامنبع الثراثْ وْ الجِدِّية

ياعْوَينَة تْرْوِي المذن المغربية

بْ نَقْشْها أو حِرَفْها التقليدِية

بْ طَرْزْها تْبارك الله عل الفاسية

هاكْدا يْكُونُو بْناتْ رْجالْ المحضيّة

مْ التَّاحْدِينْ أو مْحافْظِين علْ التَّنْمِيَّة

آجِيرانَّا قولوا لْ جِيرانْكُم

المغرب دِيالْنا

بْ صدْرُو إيغَدِّيكُمْ

آجِيرانَّا قولوا لْ جِيرانْكُم

المغرب دِيالْنا

بْ جَمالُو يفتنكم

فْ قَلْبْو إيسكَّنْكُمْ

يالله يا مْغارْبة... هْزُّوا الرَّاية

هي الطّابع...هي الأصْلْ والغاية

اللي ما شطح ما غْنَّى

فْ المغْرِب يتهنّى

وِ ينال كل ما يتمنّى

هو ف الدنيا جنة

اللِّي ما غارْ على بلادو

أرْضُو و أرض اجْدادُو

يمْشِي يركع لْ سْيادُو

مكناس كاالدُّور

بين اصْوارْها كاالدُّور

بين المدن كا الدور

ف باب المنصور

فْ الزيتُون كالدور

ف حمرية كالدور

عند المغاربة كالدور

الله م صلي عليك أرسول الله